فى البوست دى هثبتلكم احنا ليه بنعتبر دوله متخلفة ودولة عالم سابع زى مانتوا عارفين انا بشتغل فى جهة حكوميه بدون ذكر اسماء يعنى انا هنا مسئول عن قسم الكمبيوتر حبيت بقى اعمل فتك واطور القسم واشترى شوية حاجات مهمة ( اكسسوار وقطع غيار كمبيوتر يعنى تبقى موجوده للازمات اللى بتحصل للقسم كل شوية ) وخدوا بالكم بقى هنعد كده كام مرحله مرت بيها المشكله العويصه دى 0 1- روحت مكلم المدير على الفكرة اللى فى دماغى 2- قدمت طلب رسمى للمدير بمجرد الفكرة 3- المدير رفع الطلب لمجلس الادارة عشان بس يوافقوا على اننا نفكر نشترى حاجه للقسم وطبعا المرحلتين دول اخدوا حوالى اسبوعين 4- رجعت بقى قدمت مذكرة بقائمة الطلبات اللى هنشتريها للقسم 5- المدير رفع الطلب ده لمجلس الادارة 6- مجلس الادارة رفع الطلب للدكتور الاستشارى علشان يبدى راى سيادته فى الطلبات وبعد طول انتظار وفصال تفضل جلالته بالموافقه بعد ما رفض حوالى 60% من الطلبات اللى كنت طالبها بحجة انها مالهاش لازمة الوقتى ومفيش سيولة ماليه 0 7- المذكرة رجعت لمجلس الادارة ووافق عليها واتبعتت للشئون المالية 8- رجعت بقى اقدم طلب للشئون الماليه انهم يصرفولى فلوس عشان اشترى الحاجات دى بناءا على موافقة مجلس الادارة 9- رئيس الشئون الماليه رفع مذكرة لمجلس الادارة عشان يوافقوا بقى على صرف الفلوس 10- مجلس الادارة وافق وبعت مذكرة للشئون الماليه بالموالفقة دخلت المذكرة الحسابات عشان تتراجع ويتقدر المبلغ اللى ممكن يتصرف( على فكرة لحد الوقتى فات حوالى 3 شهور 11- طلع شيك بالمبلغ اللى هيتصدقوا بيه عليا فرحت قولت خلاص بقى هروح اشترى قالك لأ لازم الشيك يروح يتمضى من امين الصندوق 0 امين الصندوق مضى الشيك وبعته للشئون المالية 12- بعدين اتبعت للصراف وبعيدن راح البنك عشان يتصرف وبعدين جالى اخيرا بعد معاناه 4 شهور من ورق رايح وورق جاى وامضاءات وتاشيرات ومفاوضات عشان 250 جنيه عمى لا راحوا ولا جم شوفتوا بقى اخدنا 4 شهور عشان نشترى شوية اكسسوارات امال لو كنا بنجيب جهاز كمبيوتر كنا قعدنا قد ايه اه على فكرة انا اول متعينت مكنش ليا جهاز كنت بخمس مع رئيس القسم فى جهازه وفضلت على الحال ده شهرين ولولا ان المحافظ كان جاى زيارة لينا فى خلال 24 ساعة كان جهاز كمبيوتر باحدث المواصفات محطوط على مكتبى ده عشان خاطر المحافظ يعنى لولا سيادته مكنتش كتبت البوست دى عشان ببساطة كنت هفضل لحد الوقتى بخمس فى جهاز رئيس القسم وعجبى !!