مهندس طالع عينه

طبعا مستغربين من اسم المدنوة بتاعتى بس هو ده حال الدنيا شغلى مالوش اى علاقة بالهندسة اللى درستها ولا التخصص اللى عملت فيه مشروع تخرجى اتحولت بقدرة قادر من مهندس اتصالات لموظف حكومة بيشترى الجرنال الصبح والبطيخة بعد الضهر !!! بس انا احسن من غيرى كتير انا ليا واحد صاحبى مهندس ميكانيكا تقدير عام جيد بيشتغل صبى نقاش وواحد تانى سواق على تاكسى دى بقى غلطة مين غلطة المهندس اللى طلع عينه خمس سنين فى المذاكرة والمراجع والمذكرات والكورسات ولا غلطة اهله اللى دفعوا دم قلبهم عشان يطلع مهندس ويعوضهم ويردلهم الجميل ولا غلطة الحكومة اللى مبتوفرش فرصة عمل لكل خريج 0 بس الحكومة هتعمل ايه يعنى ماهى برضه غلبانة هتجيب شغل منين لحوالى 10000 مهندس بيتخرج كل سنة واحنا اصلا عندنا كام مصنع ولا كام شركة بتطلب تعيين مهندسين 0 بس بقى الغلطة اللى بتقع فيها الحكومة او اللى بيمثلها من المسئولين الكوسة موضوع الكوسة ده كبر قوى وبقى منتشر زى السرطان مش معقولة واحد خريج كلية تجارة ياخد وظيفة هى فى الاصل مخصصة لمهندس لمجرد انه معاه واسطة او دافع رشوة او مثلا واحد خريج معهد فنى صناعى وياخد وظيفة محاسب كان ممكن يتعين فيها خريج تجارة وهكذا بيجيلك احساس بالاحباط والياس لما تلاقى واحد اقل منك كتير واخد منك وظيفتك عشان الكوسة وصدق اللى قال نيلك يا مصر لو بقى صلصة مش هيكفى الكوسة اللى فيكى